Madaxweynaha Soomaaliya Sheekh Shariif Sheekh
Axmed ayaa maanta kaga qaybgalay dalka Jabuuti xaflad tababar loogu
furayay 500-askari oo ka tirsan ciidanka booliiska dowladda Soomaaliya.
Xafladdan,
oo ka dhacday dugisga tababarka booliiska ee Jabuuti, ayaa waxaa
goobjoog ka ahaa, madaxweyanaha Jabuuti Ismaaciil Cumar Geelle, ra’iisul
wasaarihiisa Dileyti Maxamed Dileyti, ergayga xoghayaha guud ee
Qarammada Midoobay u qaabilsan arrimaha Soomaaliya danjire Augustine
Mahiga iyo xubno kale oo ka socday beesha caalamka.
“Dowladda
Soomaaliya, waxay u baahan tahay in gacan laga siiyo tababarka
ciidanka, si ay ugu guuleysato soo celinta amamanka, runtiina waan ku
faraxsanahay in ciidammada ka tirsan booliiska Soomaaliya tababar looga
furo dalka Jabuuti,” ayuu yiri madaxweyne Sheekh Shariif.
Madaxweyne
Shariif, wuxuu si aad ah uga hadlay xaaladda Soomaaliya, gaar ahaan
dhinaca ammaanka, isagoo sheegay in dowladda ay u qosheysan tahay inay
dib u dhis ku sameyso ciidammada, si ay suurogal u noqoto inay dib u
hanato ammaanka guud ee dalka.
Ciidammada
tababarka loo furay, ayaa waxay isugu jireen rag iyo dumar, iyadoo
madaxweyne Shariif uu aad ugu ammaanay ciidanka booliiska inay soo celin
karaan ammaanka, wuxuuna kula dardaarmay inay dhexda xirtaan inta ay tababarka ku jiraan.
Madaxweynaha
dalka Jabuuti, oo isna ka hadlay xafladda, ayaa ugu baaqay ciidammadii
loo furay tababarka inay gacan ka geystaan soo celinta ammaanka
Soomaaliya, wuxuuna xusay inay ka go’an tahay dalkiisa inuu tababarro u
qabto ciidammada DKMG ah.
Danjire
Mahiga, oo isna xafladda ka hadlay ayaa sheegay, in dhaqaalaha lagu
tababarayo laguna qalabayenayo ciidammadan ay bixisay dowladda Jabbaan,
ayna u rajeynayaan ciidanka inay ku guuleystaan tababarka loo furay,
isagoo intaas ku daray in caalamku uu isha ku hayo Soomaaliya.