Wasaaradda Howlaha guud oo ku dhawaaqday in ay bilaabeyso dib u dhiska goobihii Waxbarashada


Wasaaradda Howlaha guud, Dakadaha iyo Gaadiidka Badda ee Soomaaliya ayaa ku dhawaaqday in ay bilaabi doonto dib u dhiska goobihii Waxbarashada ee ku burburay dagaaladii dalka ka dhacay, iyadoo bulshada ka dalbatay in gacan lagu siiyo howlahaasi dib u dhiska dalka.

Wasiirka wasaaradaasi Muxudin Maxamed Kaalmooy ayaa sheegay in Wasaarada ay ka go’antahay dib u dhiska xarumihii dowladda iyo Kaabayaasha dhaqaalaha, isagoo intaa ku daray howlahaasi ay goor dhow Wasaaraddu bilaabidoonto.

Sidoo kale wasiirka ayaa tilmaamay in kulankii golaha wasiirada looga hadlay Sidii dib loogu soo celin lahaa adeegyadii waxbarashada ee lacag la’aanta ahaa sidaasi darteedna ay wasaaraddu bilaabi doonto dib u dhiska dugsiyadii waxbarashada ee ku burburay dagaalada, wuxuuna rajo wanaagsan ka muujiyay in ay wasaaraddu si hufan u gudandoonto howlaha ay bulshada u heyso.

Wasaaradda howlaha guud, Dekedaha iyo Gaadiidka Badda ayaa wadda dadaallo ay dib ugu dayactireyso goobihii loogu adeegi jiray bulshada sida, dugsiyadii waxbarashada waddooyinka xarumaha kale ee dowladda iyo kaabayaasha dhaqaalaha.



Add New Comment