Ra'iisul wasaaraha Soomaaliya Max'ed C/llaahi
Maxamed (Farmaajo) iyo wafdi uu hoggaaminayo ayaa maanta ka
dhoofay garoonka diyaaradaha ee Muqdisho, iyagoo kusii jeeda dalka
Mareykanka, si ay uga qaybgalaan shir Qarammada Midoobay ay uga hadlayso
arrimaha Soomaaliya.
"Safarkeygu, waa mid ku wajahan dalka Mareykanka, gaar ahaan New
York, waxaan uga qaybgeli doonaa shir looga hadlayo arrimaha Soomaaliya,
gaar ahaan dib u dheshiisiinta iyo ammaanka dalka," ayuu yiri Farmaajo.
Ra'iisul wasaaruhu, wuxuu sheegay in shirkan oo furmi doona 14-ka
bishan uu socon doono laba maalmood, uuna rajeynayo inuu ku dhammaado si
guul ah, isagoo xusay in xukuumadda uu hoggaaminayo ay tahay mid
haysata kalsoonida caalamka.
"Shirkan,
wuxuu kaga badalan yahay shirarkii hore, caalamku wuxuu ku qanacsan
yahay sida ay ku shaqeynayso xukuumadda cusub, waayo waxay ku
guuleysatay inay baabi'iso musuq-maasuqa iyo inay bixiso mushaaraadka
ciidammada," ayuu yiri Farmaajo.
Wafdiga ra'iisul wasaaraha, waxaa garoonka diyaaradaha kusii
sagootiyay xubno ay ka mid yihiin; wasiirka Difaaca C/xakiin Maxamuud
Xaaji Fiqi, wasiirka arrimaha gudaha iyo ammaanka C/shakuur Sheekh Xasan
Faarax iyo wasiirka warfaafinta, boostada iyo isgaarsiinta C/kariin
Xasan Jaamac.
Ra'iisul wasaaruhu, wuxuu sidoo kale sheegay in shirka uu ka
qaybgalayo looga hadli doono kordhinta ciidammada AMISOM oo dowladda ka
difaaca weerarrada kaga yimaada kooxaha hubeysan, iyo howlgalkooda
Soomaaliya.
Safarkan, ayaa noqonaya kii labaad oo ra'iisul wasaaraha Soomaaliya
uu dalka dibaddiisa ugu ambabaxo, tan iyo markii xilkan loo magacaabay,
isagoo safarradii hore ku tagay dalalka Jabuuti iyo Itoobiya oo dariska
la ah Soomaaliya.
Dhanka
kale, waxaa isla maanta garoonka diyaaradaha ee Muqdisho ka dhoofay
wafdi uu hoggaaminayo wasiirka arrimaha dibadda ee Soomaaliya Maxamed
C/llaahi Oomaar, iyagoo kusii jeeda dalka Norway oo ay uga qaybgalayaan
shir arrimaha Soomaaliya looga hadlayo.
Wafdiga Oomaar, ayaa waxaa ka mid ah guddoomiyaha gobolka Banaadir
ahna duqa gobolka Banaadir Maxamuud Axmed Nuur (Tarzan) iyo wasiir u
dowlaha xafiiska ra'iisul wasaaraha Soomaaliya.