Madaxweynaha Jamhuuriyada Faderalka ah ee Soomaaliya Xasan Sheekh Maxamuud ayaa maanta Gaaray Dalka Suudaan gaar ahaan Gobol lagu magacaabo Blue Nile halkaas oo ay ka dhacayso xaflad lagu maamuusayo furitaanka Mashruuc Biyo xireen ah iyo 57 Guuradii kasoo wareegatay xiligii ay xurnimada qaateen Walalaha Suudaan.

Madaxweyne Xasan Sheekh Maxamuud ayaa waxa kusoo dhaweeyay Garoonka Diyaaradaha ee Magaalada Damaaziin ee gobolka Blue Nile dhigiisa Dalka Suudaan Cumar Xasan Axmed Al-Bashiir, halkaas oo labada Madaxwayne loogu Tumay Astaanta Labada wadan ee Soomaaliya iyo Suudaan.

Madaxweynaha Soomaaliya ayaa sidoo kale waxa lagu wadaa in ay kulamo yeeshaan dhigiisa dalkaasi kaas oo ay kaga wada xaajoonayaan xariirka labada wadan iyo isbadaladii ugu dambeeyay ee labada wadan soo foodsaaray bilihi lasoo dhaafay.

madaxweynaha Soomaaliya ayaa lagu wadaa in uu ugu hambalyeeyo dhigiisa Dalka Suudaan iyo Shacabka 57 Guuradii kasoo wareegatay xiligii ay ka qaateen Xurnimada Engiriiska taasoo ku beegan maanta oo ah 1 bisha January.

Dowladda Suudaan oo ah wadamada saaxiibka la ah Soomaaliya ayaa waxa ay noqonaysaa ka qayb galka munaasabadahooda Xariirka qotada dheer ee labada shacab iyo midka siyaasadeedba u dhaxeeya.

waa booqashadii ugu horaysay uu madaxwayne Xasan Sheekh Maxamuud uu ku tago Dalka Suudaan intii loo doortay Madaxwaynanimada Soomaaliya 10 bishii September sanadkii 2012