Wararka laga helayo Gobalka Galgauud ayaa sheegaya in maanta uu gaaray degmada
Gure-ceel Gen. Max'ed Nuur Galaal oo ka mid ah Saraakiisha Sar sare ee
Ciidamadii Xoogga dalka Soomaaliyeed kaas oo ka soo duulay Magaalada Nairobi ee
dalka Kenya.
Gen, Max'ed Nuur Galaal oo safarka uu ku tagay Magaalada
Guri-ceel ee Gobalka Galgaduud uu ku wehliyay Guddoomiyaha degmada ee Maamulka
Culimada Ahlu Sunna Waljameeca Cismaan Ciise Nuur (Taar-dhuleed) ayaa waxaa
siweyn halkaas ugu soo dhaweeyay waxgaradka degmada Gure-ceel iyo Saraakiil sar
sare oo ka tirsan Ahlu Sunna Waljameeca.
Sida uu HOL u sheegay Wariye
Madax bannaan oo jooga Gobalka Galgaduud Gen. Max'ed Nuur Galaal ayaa kulan
saacado badan qaatay waxaa uu la galay waxgaradka degmada Gure-ceel iyo
Saraakiil ka tirsan Maamulka Ahlu Sunna ee Goballada dhexe kaas oo uu
hoggaaminayay Guddoomiyaha Gudigga Fulinta Maamulka Ahlu Sunna Max'ed Yuusuf
Xeefow.
Ilaa hadda dhab ahaan looma shaacin waxyaabaha ay ka wada
hadleen Gen. Galaal iyo Mas'uuliyiinta Maamulka Ahlu Sunna Waljameeca ee
Goballada dhexe, laakiin waxaa dadka sida weyn ugu dhuun daloola arrimaha
Siyaasada sheegayaan in kulankaasi uusan ka marneyn ka hadalka dhaq dhaqaaqyada
Miletari ee Culimada Ahlu Sunna ay ka wadaan deegaanno badan oo ka tirsan
Goballada bartamaha Soomaaliya.