Xaafadda Wembley ee magaalada London ayaa
shalay lagu qabtay xaflad loogu gogol-xaarayay xisbi siyaasadeed cusub
oo lagu magacaabay Hiil-Qaran, kaasi oo ay qaabeyntiisa hor-boodayaan
rag si weyn looga yaqaano Soomaaliya oo siyaasiyiin iyo aqoonyahanno
isugu jira.
Halka lagu qabtay Xafladda ayaa waxaa ka soo xaadiray dad badan,
inkastoo masraxa shirka ay fadhiyeen dad si weyn loogu ixtiraamo
siyaasadda Soomaaliya sida Ra’iisal Wasaarihii hore ee Soomaaliya
C/risaaq Xaaji Xuseen iyo Cusmaan Jaamac Cali Kalluun, Danjire Maxamed
Shariif iyo C/qaadir Aadan Shiikh Jengeli.
Liibaan Daahir Nuur oo ka mid ah Ardayda wax-ka-barata Jaamacadda
London, isla markaana shirkaas ka qeybgalay ayaa qaabkii shirkaas uu u
dhacay waxaa uu uga warramay Laanta Afka Soomaalida ee BBC-da, wuxuuna
sheegay in Xisbiga Hiil-Qaran ee shirka loogu gogol-xaarayay uu ula
muuqday mid in muddo ah laga soo shaqeynayay oo hadda wixii ka dambeeya
la doonayo in la shaaciyo, isagoo xusay in daadiyihii shirka oo ahaa
Prof. Cabdi Ismaaciil Samatar uu mar ka dhawaajiyay in Dhuuxa Xisbigan
uu yahay Ra’iisal Wasaarihii hore ee Soomaaliya C/risaaq Xaaji Xuseen.
Halkan ka dhegeyso
Faah-faahinta Shirkan -BBC
Waxaa uu intaas ku daray Liibaan Daahir in Ra’iisal Wasaarihii hore
ee Soomaaliya C/risaaq Xaaji Xuseen oo shirka ka hadlay uu sheegay in ay
muhiim tahay in Soomaalida isu tagto, isla markaana ay sameystaan wax
ay wada leeyihiin oo aan ahayn Dowlad dalka dibaddiisa lagu soo dhisay
ama sida uu u yiri ay wadaan dowlado shisheeye ah.
Xisbigan
Siyaasadeed ee magaciisu yahay Hiil-Qaran ayaa haddii si rasmi ah loo
shaaciyo, waxaa uu noqonayaa xisbi siyaasadeedkii ugu horreeyay oo ay
hoggaankiisa hayaan dad Qurbo-joog ahaa, kuwaasi oo si weyn looga
yaqaano Soomaaliya gudaheeda iyo dibaddeeda, waxaase is-weydiin leh sida
Xisbigan uu lugta u soo gashan doono siyaasadda jaha-wareersan ee
Soomaaliya, taasi oo aan hadda maareynteeda gacanta ugu jirin sida la
wada ogyahay dadka Soomaaliyeed.