Guddoomiyihii ururka Xisbul Islaam Sheekh Xasan Daahir Aweys, ayaa markii ugu
horreysay kala hadlay saxaafadda xaflad lagu maamuusayay midowga Xarrakatul
Shabaab iyo Xisbul Islaam, isagoo si aad ah uga hadlay dagaallada ka socda
Muqdisho.
"Dagaallada ka socda Muqdisho, waxay la mid yihiin salaadda, waxaana waajib
ku ah qof walba oo Soomaali ah inuu siduu awoodo uga qaybqaato," ayuu yiri
Sheekh Xasan Daahir. Isagoo intaas raaciyay: "Waa in dagaallada socda lagu
bixiyo maal iyo naf, qofkii aan awoodinna uu af uga qayb-qaato."
Sheekh Xasan Daahir, ayaan khudbadiisii ku sheegay inuu taageerayo go'aanka
ay ku midoobeen Xarrakatul Shabaab iyo Xisbul Islaam, kuwaasoo qaatay magaca
Al-Shabaab, isagoo intaas ku daray in looga baahan yahay in shacabka
Soomaaliyeed ay ku midoobaan kallimada Alle.
Mudane Aweys, oo haatan ka mid ah mas'uuliyiinta Xarrakatul Shabaab, oo ka
talisa gobollada koonfurta ee Soomaaliya, ayaa xafladda uu ka hadlay waxay ka
dhacday degmada Afgooye ee gobolka Shabeellada hoose oo 30-km koonfur kaga
beegan magaalada Muqdisho, halkasoo ahayd degmadii ugu dambeysay ee Xisbul
Islaam ka talinayeen markii ay ku biirayeen Xarrakatul Shabaab.
"Waxaan, ugu baaqayaa mas'uuliyiinta Xarrakatul Shabaab inay sameeyaan
guddiyo taakuleeya dadka ku nool deegaannada ay abaaruhu ku dhufteen, shacabka
iyo ganacsatadaha looga baahan yahay inay kaalmeeyaan walaalahooda ay abaaruhu
dhibaatada u geysteen," ayuu yiri Sheekh Xasan Daahir.
Madax dacwada ee Xarrakatul Shabaab Sheekh Fu'aad Maxamed Khalaf, oo isaguna
ka hadlay xaflada, ayaa ku dheeraaday ka hadalka midowga Xarrakatul Shabaab iyo
Xisbul Islaam, isagoo ku sheegay inay tahay qorshe ay ku doonayaan inay ku meel
mariyaan hadafkooda ku aaddan inay cadowga ka saaraan Soomaaliya.
Sheekh Fu'aad, ayaa si kooban uga hadlay qarax ka dhacay Masjid ku yaalla
suuqa Bakaaraha sannadkan horraantiisii, kaasoo uu sheegay in ujeedadu ahayd in
lagu dilo isaga, balse uu ka badbaaday, sababta loo badbaadiyayna uu u arko inuu
arko midowga mujaahidiinta Soomaaliya.
Munaasabaddan, ayaa noqonaysa tii labaad oo ay ma'suuliyiin ka tirsan
Xarrakatul Shabaab iyo kuwii Xisbul Islaam ay ka hadlaan, iyadoo munaasabaddii
middan ka horreysay oo ka dhacday Muqdisho ay mas'uuliyiintu ku iclaamiyeen
dagaallo cusub oo lala galo dowladda Soomaaliya iyo ciidammada AMISOM.