Kulanka ayaa waxaa shir-guddoominayay afhayeenka baarlamaanka Shariif
Xasan Sheekh Aadan, iyadoo xildhibaannadii mooshinka ka keenay
xukuumadda ay ka baaqsadeen insay kulanka soo xaadiraan, kaddib markii
ay ku tilmaameen mid aan sharciga waafaqsanayn, waxaana mudanayaashaas
kasoo xaadiray xubin keliya.
Markii uu kulanku furmay ayuu Shariif Xasan u yeeray xubnihii
mooshinka ka keenay xukuumadda, iyadoo uu soo istaagay xildhibaan
C/rashiid Cali C/lle oo ka hor-sheegay mudanaayaasha iyo guddoonka in
markii uu eegay xalaadda dalka ay ka laabteen mooshinka.
"Waxaan sannad iyo bar ka hor nasiiseen kalsooni, markaan halkaan
nimid ma jirin wax naga soo horeeyay oo dowladii hore aan ka dhaxalnay,
waxaana go'aansanay inaan wax ka qabanno amaanka iyo dhismaha ciidanka,"
ayuu yiri Sharma'arke oo intaas ku daray inay nasiibdarro tahay in
xukuumadda laga keeno mooshin iyadoo jiraan caqabado fara badan.
Sharma'arke, wuxuu sheegay in caqbadihii ka horyimid xukuumaddiisa
muddadii ay shaqeynaysay ay ka mid yihiin iyadoo ciidamadii dowladda
loosoo tababaray ee la doonayay in wax looga qabto ammaanka ay intooda
badan ku biireen kooxaha kasoo horjeeda.
Xildhibaanadii kulanka fadhiyay ayaa waxay tiradoodu gaaraysay
290-mudane, waxaana fadhigii maanta qaadacay mudanaayashii mooshinka ka
keenay xukuumada, kuwaasoo fadhig kale ku yeeshay Muqdisho.
Ra'iisul wasaare Sharma'arke oo doonayay inuu u mahadceliyo mudanihii
sheegay in laga laabtay mooshinkii xukuumadda laga keenay ayaa waxaa u
diiday hadalka sameeyay Shariif Xasan oo ka dalbaday inuusan ka haldin
arrintaas, wuxuuna guddoomiyuhu ka codsaday xubnihii mooshinka keenay
xukuumadda inay kasoo qaybgalaan fadhiyada soo socda.
Wasiirka dastuurka iyo arrimaha federaalka Madoobe Nuunow Maxmed oo
ay xukuumaddu u wakiilatay ka hadlka mooshinka ayaa sheegay in
xildhibaanada ay ka eegeen xukuumada waxqabad la'aan, balse loo baahan
yahay inay ka eegaan dhinaca kale oo ah waxqabadkeeda.
Xildhibaan Salaad Cali Jeelle oo loo ogolaaday inuu ka hadlo kulanka
ayaa sheegay in xukuumadda Sharma'arke ay dhacday, maadaama ay ku
guuldareystay in wixii loo soo doortay ay qabato, loogana baahan yahay
inay kalsooni ay ku shaqeyso hesho.
Muran xoog leh ayaa ka dhashay madasha kulanka uu ka socday, iyadoo
intii kulanku uu socday ay kusoo dhaceen xarunta iyo hareeraheeda dhowr
madfac oo ay soo tuureen kooxaha dowladda KMG ah ka horjeeda.
Guddoomiyaha Shariif Xasan ayaa ugu dambeyn ku dhawaaqay inuu kulanku
xiran yahay isagoo sheegay in xubno ka socda beesha caalamka ay ku
sugan yihiin madasha, sidoo kalena ay joogaan saraakiisha ka socda
AMISOM.
Shariif Xasan wuxuu sheegay in kulammada baarlamaanka ay sii
soconayaan, isagoo ugu baaqay in xubnaha kale ee aan kulammada kasoo
qaybgelin u sheegay in lala xisaabtami doono, wuxuuna sheegay in
xildhibaan walba laga doonayo xilliyada ay furmayaan baalamaanka inay
xarunta joogaa.
Guddoomiyuhu wuxuu dhaliil u soo jeediyay
mudanayaal maanta kulan kale ku yeeshay qaybo ka mid ah Muqdisho, isagoo
sheegay in laba shir oo uu baarlamaanku leeyahay aysan ka socon karin
caasimadda Soomaaliya ee Muqdisho.
Mudanayaasha baarlamaanka ayaa markii ay dibadda u soo baxeen waxay
si hoose u sheegayeen in looga baahan yahay xukuumadda inay kalsooni
hesho, iyadoo uu u muuqdo mooshinka xukuumadda laga keenay mid furmay,
inkastoo Shariif uu ka gaabsaday inuu mooshinka ka hadlo.