Madaxweynaha Soomaaliya Sheekh Shariif Sheekh ayaa warsaxaafadeed uu maanta soo
saaray kaga codsaday beesha caalamka inay gacan ka siiyaan dagaalka ay
dowladdiisu kula jirto Xarrakatul Shabaab iyo Xisbul
Islaam.
“Sax ma ahan in
Soomaaliya kaligeed lagu daayo ka hortagga Al-shabaab iyo jaalkooda Al-qaacida,
maadaama Soomaaliya kusoo jirtay 20-sano
oo burbur, qas iyo jahawareer siyaasadeed ah,” ayuu Sheekh Shariif ku yiri
warsaxaafadeedka uu soo saaray.
Madaxweynuhu wuxuu ku
sheegay war-murtiyeedkiisa in weearkii hotel Muna ee dhacay 24-kii bishan laguna
dilay 33-qof oo ay ku jireen xildhibaanno iyo saraakiisha ciidamada uu la mid
yahay weerarkii ay Xarrakatul Shabaab ka geysatay dalka Uganda bishii
hore, kaasoo ay ku dhinteen 76-qof.
Sidoo kale, wuxuu
sheegay in kooxaha Islaamiyiinta ah ee ka dagaalamaya Soomaaliya iyo ururka
Al-Qaacida oo ay xiriir leeyihiin ay u soo tafo-xayteen inay ku baahiyaan
falalkooda argagaxisonimo ee ay ka wadaan Soomaaliya una gudbiyaan dalalka
gobolka iyo kuwa caalamka.
“Xarrakatul Shabaab
iyo saaxiibbadood Al-Qaacida waxay qorsheysteen inay xoojiyaan argagaxisonimada,
carqaladda iyo xasilooni la’aan geeska Afrika oo caalamka intiisa kale,” ayuu
madaxweynuhu mar kale ku sheegay hadalkiisa.
Sheekh Shariif, wuxuu
intaas ku daray: “Dowladda Soomaaliya, waxaa ka go’an, dib-u-yag-leelidda
sharciga iyo kala-dambeynta Muqdisho, iyo inay gaashaanka u daruurto Al-shabaab
iyo kuwa taageera ee wata afkaaraha ku xiran xag-jirnimada ee ay fidiniyaan.” oo
intaas dabodhigay: “Inkastoo ay jiraan culeysyadaas, waa inaanan illoobin in
guushu ay u baahan tahay istaraatijiyad iyo dhabar-adayg.”
Wuxuu sheegay in
dowladdiisu aysan ka maarmi karin kaalmooyinka beesha calaamka, si ay uga
hortago falalka uu ku sheegay argagaxisada oo ay wadaan kooxaha dowladdiisa ka
horjeeda.
Madaxweynaha, oo farta
ku fiiqaya walaaca uu qabo ayaa tusaale u soo qaatay hadal dhawaan ay xukuumadda
Washington
sheegtay kaasoo ahaa in Al-qaacida ay khatar weyn ku hayso Soomaaliya, marka la
eego dalalka kale ee ay ka howlgalaan.
“Dowladda Soomaaliyeed waxay wajahaysaa cadow
la mid ah kuwa dalalka Afgaanistaan, Bakistaan iyo Ciraaq ay la tacaalayaan,
waaba haddii aysan ka khatar badnayn,” ayuu ku xusay warkiisa Sheekh Shariif oo
sheegay in dowladdiisu aysan ahaysan taageero la mid ah ama u dhow kuwa ay
dalalkaas haystaan, sidoo kalena aysan lahayn ilaha dhaqaale ee ay dalalkaas
leeyihiin.
Ugu dambeyn
Madaxweynuhu wuxuu qoraalkiisa ku yiri: “Maadaama kooxa ka dagaalama Soomaaliya
ay wadaan khatar isaga gudbaysa xuduudaha, waxay dowladda Soomaaliya ku
celinaysaa dalabkeedii ahaa in lala soo gaaro taageero caalami ah.”
Hadalka Madaxweynaha
ayaa imaanaya iyadoo muddo hal todobaad ka badan ay dagaallo iyo duqeymo u
dhexeeya xukuumaddiisa oo kaashanaysa AMISOM iyo xoogagga Islaamiyiinta ah ay ka
socdaan Muqdisho, kuwaasoo dad badan ay naftooda ku waayeen kuwo kale ay u
dhaawacmeen.