Dowladda Soomaaliya ayaa maanta tababar u furtay
800-askari oo ka tirsan ciidamada Booliiska, kuwaasoo la barayo howlo la
xiriira shaqadooda, sida uu xafladda furitaanka ka sheegay Taliyaha Ciidanka
Booliiska Soomaaliyeed Gen. Cali Maxamed Xasan (Cali Madoobe).
Xafladda
furitanka tababarkan ayaa waxaa ka qaybgalay mas'uuliyiin ka tirsan Dowladda oo
ay ka mid ahaayeen: Ra'iisul wasaare ku xigeenka ahna Wasiirka Kalluumeysiga iyo
Kheyraadka Badda Prof. C/raxmaan Xaaji Aadan (Ibbi), Wasiirka Arrimaha Gudaha
Sheekh C/qaadir Cali Cumar iyo Taliyaha Ciidanka Booliiska.
Ciidamada
tababarka loo furay oo ay ku jireen 150-haween ah ayaa waxaa halkaas dardaraan
uga jeediyay madaxda Dowladda, waxaana ugu horreyn hadlay Taliyaha Booliiska
isagoo sheegay in tababarkan uu socon doono muddo kooban, isagoo intaas raaciyay
in ciidamadan laba sano ka hor ay tababar kusoo qaateen
Itoobiya.
Ra'iisul wasaare ku xigeenka ahna Wasiirka Kalluumeysiga iyo
Kheyraadka Badda Prof. C/raxmaan Xaaji Aadan (Ibbi) oo isaguna ka hadlay goobta
ayaa sheegay in ciidamadan laga doonayo inay si daacadnimo ay ku jirto ay u
shaqeeyaan.
"Askarta waxaan uga digayaa inay dadka shacabka ah dhac u
geystaan, waayo waa ceeb in askari laga sugayay inuu dadka ilaaliyo ammaankooda
uu ku laabto jeebkooda" ayuu yiri Prof. C/raxmaan Ibbi.
Wuxuu intaas ku
daray: "Waxaa tihiin askar qurux badan oo aan hubo inay waajibka saaran u gudan
doonaan si daacadnimo ay ku jirto, balse waxaan ku habaaraynaa askarigii dadka
dhac u geysta inay xabbada ugu horreysa ku dhacdo".
Ciidamadan ayaa waxay
qayb ka yihiin ciidamada ay dowladda Soomaliya kuwaasoo ay ugu talogashay inay
wax kaga qabato xalaadda ammaan xumo ee dalka ka taagan, sida ay sheegeen
xubnihii maanta ka hadlay furitaanka Tababarka.