Saraakiisha badda ee wadanka
Maraykanka ayaa ka soo horjeestay qorshe maalmihii u dambeeyay la hadal hayay oo
lagu hubaynayo shaqaalaha la socda Maraaiibta ganacsiga ee ku safra goobaha ay
ku badanyihiin kooxaha burcad badeeda Soomaalida.
Saraakiishu waxaa ay sheegeen in
arinta ay ka weyn tahay in maraakiibta iyo shaqaalaha saaran ay hub qaataan
balse loo baahan yahay in si ka weyn
loola dagaalamo kooxaha burcad badeeda Soomaalida ah iyadoo lagala dagaalamayo
dhulka iyo Badda.
Admiral Gary Roughead oo ka mid ah
taliyayaasha ciidamada badda wadanka mareykanka ayaa waxaa uu sheegay in kooxaha
burcad badeeda aysan ku nooleyn Badda,waxana uu tilmaamay in ay ku nool yihiin
bariga loona baahan yaha in laga xanibo agabka iyo waxyaabaha kale ee ay ku nool
yihiin.
Waxaa uu sheegay sarkaalkaasi in
goobta ay kooxaha burcad howlaha qafaalashada ay ka wadaan ay 4-mar ka weyn
tahay gobolka Texas ee wadanka Mareykanka isla
markaana uusan ka jirin sharci ka hor taga kooxaha burcad badeeda
Soomaalida.
Illaa iyo markii kooxaha burcad
badeeda Soomaalida ah ay afduubeen Captan u dhashay wadanka mareeykanka ayaa
sharci yaqaano u dhashay Mareykanka waxaa ay soo jeediyeen in ciidamada badda
Mareykanka ay raacaan maraakiibta ganacsiga tilaabadaasi oo ah mid ay ka soo hor
jeesatay wasaarada Gaashaandhiga wadnka Mareykanka ee
Pentagon.
Saraakiisha Mareeykanka ayaa waxaa
ay soo jeediyeen in la bilaabo howlgalo hor leh oo lagu ciqaabayo,lagu
burburinayo laguna hakinayo hantidooda kooxaha burcad badeeda
Soomaaliya.
Michael Mullen oo ka mid ah
taliyayaasha ciidamada Mareykanka ayaa warfidiyeenka u sheegay in uusan
taageyrsaneeyn in maraakiibta Ganasiga ay hub qaataan taasi oo uu tilmaamay in
maraakiibta ay haboon taha in ay kireystaan Ciidamo ammaan oo gaar
ah.
Waxaa uu sidoo kale tilmaamay in
maraakiibta isticmaala xeebaha Soomaaliya weerarada lagu hayo ay yihiin kuwa aad
u badan,waxaana uu soo jeediyay in si weyn loola dagaalamo kooxaha burcad
badeeda Soomaalida ah lagana sii daayo maraakiibta ay hada gacanta ku
hayaan.
Ugu danbeeyntii waxaa uu
sarkaalkaasi sheegay in dhibaatada kooxaha burcad badeeda ay tahay mid ka weeyn
sida la moodo dhibaatadana ay ka jirto Soomaaliya oo dhan,waxaana uu beesha
caalamka u soo jeediyay in xaalada Soomaaliya wax laga qabto.