Madaxweynaha Soomaaliya Shariif Sheekh Axmed ayaa maanta cafis u fidiyay
dhalinyaro maxaabiis ahaan ugu xirneyd Xabsiga dhexe ee Magaalada Muqdisho,
kuwaasoo Dowladdii hore ee C/llaahi Yuusuf ku soo xirtay falal
argagixiso.
Dhalinyaradan cafiska loo fidiyay oo gaaraya ilaa 14-ruux
ayaa qaarkood waxaa lagu xukumay 2 sano iyo bar, waxaana maanta markii laga soo
daayay Xabsiga la dar daarmay Madaxweynaha oo loogu keenay Aqalkiisa
Madaxtooyada.
Taliyaha Ciidamada Asluubta C/llaahi Macalin Cali ayaa
sheegay in sii deynta Maxaabiistan ay ka dambeysay kadib markii baaritaano lagu
sameeyay dambiyadooda, isla markaana codsi u direen Madaxweynaha.Dhalinayaradan ayaa Xabsiga ku jiray muddo 8-bilood, waxaana intii ay xabsiga ku
jireen ay aad uga cawdeen dhibaatooyin ay sheegeen in lagula kici jiray xilligii
Dowladdii C/llaahi Yuusuf jirtay, iyagoona sheegay in wax aanay aqoon lagu
eedeyn jira sida Argagixiso iyo inay ka tirsan yihiin Ururka
Al-Qaacida.
Madaxweyne Shariif oo hadal u jeediyay dhalinyaradan ayaa
kula dar daarmay inay ka faa'ideystaan fursadan oo ay noqdaan muwaadiniin
dalkooda iyo dadkooda wax u tara, isagoona uga digay inay ka qeyb qaataan
ficilada hada socda oo uu sheegay in dad culumo sheeganaya inay dhiig faraha
kula jiraan.
"Hadii shalay la idinku soo xiray arrimo diineed, maanta
waxaa dalka ka dhaqan galay diinta, oo sidaas ayaa cafis la idinku sameeyay"ayuu
yiri Madaxweyne Sheekh Shariif oo hadalo soo jiidasho iyo kasbasasho u jeediyay
dhalinyaradii uu cafiska u fidiyay.
Waxaa uu sheegay Madaxweynaha in
qofka muslimka looga baahan yahay in gacantiisa iyo afkiisa laga nabad galo,
laakiin waxaa uu nasiib daro ku tilmaamay in dad sheeganaya Muslimiin iyo Culumo
inay baneystaan daadinta dhiiga shacabka.
Waxaa uu sheegay in Dalka
iminka wixii ka dambeeyay lagu xukumayo shareecada, waxaana uu ka dalbaday ineey
fahmaan islaamku inuu yahay nidaam, kala danbeyn, dhowrida sharciga iyo adeecida
Madaxda.
"Waxaan idinka digayaa oo aan idinku talinayaa in aadan ku
kadsoomin fikradaha hada socda oo dhalinyaro badan la qaldayo oo ah in qof
muslim ah lagu qanciyo inuu isku qarxiyo qof walaalkiis oo muslin ah"ayuu mar
kale ku celiyay Madaxweyne Shariif oo aad ugu dheeraaday dar daaranka
dhalinyaradii uu maanta cafis u fidiyay, isagoona damacsanaa in aanay ku biirin
kooxaha Dowladiisa ka soo horjeeda.
Waa markii u horeysay oo Dowladda
Madaxweyne Shariif ay cafis u fidiso maxaabiis ay xirtay Dowladdii C/llaahi
Yuusuf, iyadoo horay loo xusuusto in dadka ay xirto Dowladdaas ay ka qaadi
jirtay lacago baad oo sii deyntooda lagu xiro, taasoo aheyd madax furasho.
.