Amiirka Dowladda Qatar ayaa dalkiisa casuumaad rasmi ah ugu fidiyay hoggaamiye
Sheekh Xasan Dahir Aweys oo wax ka hoggaamiya Ururada Islaamiga ah ee kasoo horjeeda dowladda Madaxweyne Sheekh Shariif kuwooda ugu awoodda badan, fadhigiisuna yahay magaalada Asmara ee dalka
Eritrea.
Casuumaada Sheekh Xasan Dahir ayaa timid kaddib markii
Madaxweynaha Soomaaliya Sheekh Shariif uu gaaray Magaalada Doxa, halkaasoo uu
ka socdo shir madaxeedkii 21-aad ee waddamada ku jira Ururka Jaamacadda Carabta.
Wararka qaar ayaa sheegaya in Dowladda Qatar ay dooneyso inay dhex dhexaadiso
Madaxweyne Sheekh Shariif iyo Hogaamiyaha Islaamiga Sheekh Xasan Dahir oo lagu
sheego inuu asal u ahaa aas aasida Islaamiyiinta Soomaaliya.
Amiirka Dowladda Qadar ayaa sheegay inay wadaan gogol nabadeed oo
ay u dhigayaan Madaxweynaha Soomaaliya Sheekh Shariif iyo dhinacyada ka soo
horjeeda, iyadoo dhowaan Dowladda Qadar wafdi u soo dirtay Soomaaliya, kaasoo
qeyb ka ahaa Gudiga Culimada Islaamka.
Dawladaha Qadar, Liibiya iyo Sudan
ayaa waxay u ballan qaadeen Madaxweynaha Soomaaliya Sheekh Shariif Sheekh Axmed
inay dhex dhexaadin doonaan Dowladiisa iyo kooxaha ka soo horjeeda, waxaana laga
war sugayaa hadba sida uu Sheekh Xasan Daahir Aweys uga jawaabo casuumaddaasi uu
u fidiyay Amiirka dalka Qadar.