Ra'iisul Wasaaraha Dowladda Soomaaliya mudane Cumar Cabdirashiid Cali Sharmaarke ayaa
cambaareeyay isku daygii la doonayay in lagu qaarijiyo Wasiirkiisa Arrimaha
Gudaha Sheekh Cabdulqaadir Cali Cumar, kaddib markii maanta lala beegsaday qarax miino oo ka dhacay agagaarka Suuqa weyn ee Bakaaraha.
Ra'iisul Wasaaraha oo Wariyeyaasha kula hadlayay Xafiiskiisa
kadib kulan uu la qaatay Saraakiil ka socotay Qaramada Midoobay ayaa sheegay
inuu aad uga xun yahay weerarkaas, isagoona ku tilmaamay inuu ahaa weerar
fulaynimo ah.
"Aad baan uga xumahay qaraxaas, Ilaah ayaa mahad leh
wasiirku waa uu ka bad baaday weerarkaas, waana weerar fulaynimo ah"ayuu yiri
Ra'iisul wasaare Cumar Cabdirashiid oo ka hadlay saacado kadib markii Wasiirka
Arrimaha Gudaha si dirqi uga bad baaday isku day la doonayay in lagu qaarijiyo.
Ra'iisaul wasaare Cumar Cabdirashiid Cali Sharma'arke ayaa ku celceliyey inaaney jirin sabab qaraxyo loola beegsado xubnaha xukuumaddiisa maadaama buu yiri aan diyaar u nahay inaan wadahadal la furano kooxaha naga soo horjeeda.
Hadalkan Ra'iisul wasaaraha ayaa yimid kaddib markii qarax miinada dhulka lagu qariyo ah lala beegsaday uuna ka badbaaday wasiirka arrimaha gudaha dowladda midnimada qaran Sheekh Cabdulqaadir Cali Cumar asagoo markaa lug ku marayey meel u dhow suuqa weyn ee Bakaaraha.