Mudane ka tirsan Baarlamaanka oo ka hor yimid go'aankii ay Dowladda ay ku
dalbatay Ciidamo shisheeye.Mudane ka tirsan Baarlamaanka Midnimada Qaran ayaa maanta kasoo horjeestay dalabkii uu
bixiyay wasiirka Arrimaha Dibadda Soomaaliya Maxamed Abdullahi Oomaar kaas oo uu
Golaha Ammaanka kaga dalbaday Ciidamo shisheeye oo dheeraad ah.
Sheekh
Axmed Cabdullaahi oo loo yaqaan Sheekh Fanax oo ka mid ah Xubnaha Baarlamaanka isku
dhafka ah, gaar ahaan dhinacii ka yimid Isbaheysiga Dib u xoreynta garabkii
Jabuuti ayaa ku tilmaamay arrinta dalabshada Ciidamada Shisheeye ay tahay mid ku
gaar ah Wasiirka Arrimaha Dibadda.
"Ma jirto codsi ka yimid Dowladda
Midnimada qaran oo lagu dalbanayay Ciidamo Shisheeye oo hor leh, marka dalabka
Wasiirka Arrimaha Dibeda Mr Oomaar waa mid isaga u gaar ah"ayuu yiri Sheekh
Fanax oo ka mid ahaa Saraakiishii Maamulkii Midowgii Maxkamadaha ee sanadkii
2006-dii ka hana qaaday Bartamaha iyo Koonfurta Soomaaliya.
Sheekh Fanax
ayaa tibaaxay in dhowaan Golaha Wasiirada uu meel mariyay qaraar ku saabsan in
dalka laga hirgeliyo, waxaana uu intaa ku daray in la qaato ku dhaqanka
shareecada islaamka iyo in la keeno Ciidamo Shisheeye aanay isla meel
galeyn.
Hadal uu xalay ka jeediyay Fadhiga Golaha Ammaanka uu ku yeeshay
magaalada New York Wasiirka Arrimaha Dibeda Maxamed Abdullahi Oomaar ayuu kaga
dalbaday in Ciidamo shisheeye oo gaaraya saddex kun, kuwaasoo uu ku sheegay inay
ka imaan doonaan Dalalka Uganda iyo Brundi, waxaana uu ka codsaday Golaha in la
taageero.