Ra'iisul Wasaaraha DKMG ee Soomaaliya Cumar Cabdirashiid Cali Sharma'arke ayaa maanta kulan
gaar ah xafiiskiisa kula yeeshay Odayaasha Dhaqanka iyo Midnimada Beelaha Hawiye,
iyagoona ka wada hadlay arrimo dhowr ah oo ay ku jirto xal u helidda xaaladda ammaan ee Magaalada
Muqdisho.
Kulanka oo ahaa mid ay albaabadu u xiran yihiin ayey labada dhinac isku dhaafsadeen aragtiyadooda, iyadoona ugu dambeyn ay Odayaasha Hawiye shuruudo hor
dhigeen Ra'iisul Wasaare Cumar Cabdirashiid Cali Sharmaarke.
Gudoomiyaha
Odayaasha Hawiye Maxamed Xasan Jimcaale (Xaad) oo saxaafada kula hadlayay
afaafka hore ee Hoyga Ra'iisul Wasaaraha ayaa sheegay in Ra'iisul Wasaaraha ay
kala hadleen sidii looga hortagi lahaa dagaalo kale oo dalka ka dhaca, sidii
Ciidamada AMISOM dalka looga saari lahaa iyo sidii dib u heshiisiinta loo sii
wadi lahaa iyo sidii Shareecada Islaamka dalka loogu xukumi
lahaa.
Maxamed Xasan Xaad ayaa sheegay in Ra'iisul Wasaaraha ay siiyeen
tallooyin dhowr ah oo ay ugu weyn tahay xal u helida Caasimada Muqdisho oo
rabshadaha ugu badan ka dhacaan.
"Waxaan u sheegnay Ra'iisul Wasaaruhu in
joogitaanka Ciidamada AMISOM aanu faa'ido badan u keeneyn shacabka, waxaase ku
talinay in Ciidamada AMISOM dalka laga saaro, si loo helo nabad iyo xasilooni,
waxaan kaloo u jeedinay in dib-u-heshiisiinta la sii wado iyo in aaney
dagaallo kale dhicin iyo in shareecada Islaamka dalka lagu xukumo, waana naga
aqbalay Ra’iisal Wasaaraha”ayuu yiri Maxamed Xasan Xaad.
Ra'iisul Wasaare Cumar C/rashiid oo ah nin
degan oo ay u dheer tahay xilkasnimo ayaa u muuqda mid uruursanaya xogta dadka
ku dhaqan Soomaaliya, gaar ahaan Magaalada Muqdisho, wuxuuna shalay kulan la
yeeshay mas’uuliyiin ka socday hay’adda Culumaa’udiinka Soomaaliyeed kuwaasi oo
uu iyana kala hadlay sidii xal loogu heli lahaa mushkiladda
Soomaaliya.
Xukuumada uu hogaamiyo Ra'iisul Wasaaraha ayaa cadaadiska ugu
badan ee la saarayo ayaa ah inay qaadato ku dhaqanka shareecada Islaamka oo ah
tan kaliya ee horseedi karta xalka umada, iyadoona wali Xukuumada aanay si toos
iyo si dad ban uga hadlin ku dhaqanka shareecada Islaamka ee laga war dhowrayo
inay ansixiyaan, inkastoo uu dhowr jeer ku cel celiyay Madaxweynaha inuu dalka
ku dhaqi doono shareecada islaamka.