Warar horu dhac ah ayaa ka soo baxaya Doorashada Hogaanka Gudiga Olimbikada
Soomaaliyed ee GOS, iyadoona doorashada oo si heer sare ah uga socotay Magaalada
Jabuuti uu ugu dambeyn ku guuleystay Aadan Xaaji Yabarow Wiish oo ahaa Gudoomiye
Kuxigeenka Gudiga Olimbikada Soomaaliyed.
Doorashada Gudiga Olimbikada
Soomaaliyed oo ay u tartamayeen Gudoomiyaha iyo Gudoomiye Kuxigeenka Gudigaas oo
lagu kala magacaabo C/qaadir Gacal Abkow iyo Kuxigeenkiisa Aadan Xaaji Yabarow
Wiish.
Aadan Xaaji Yabow Wiish ayaa la
sheegay inuu helay inta badan codkii Xiriirada iyo Ururada soo doorta Hogaanka
Gudiga Olimbikada Soomaaliyed, iyadoona 18 ka mid ah ururada iyo Xiriirada kala
duwan ay u codeeyeen Mr Wiish, halka C/qaadir Gacal Abkow uu helay cod
kaliya.
Doorashada ka dhaceysa Magaalada Jabuuti, gaar ahaan Hotelka
Kulan ee lagu dooranayay Hogaanka Gudiga Olimbikada Soomaaliyed waxaa goob joog
ka ahaa Wakiilo ka socda Xiriirka Olimbikada Aduunka oo marka magaciisa la soo
gaabiyo loo yaqaan IOC, isla markaana lahaa qaban qaabada
doorashadaan.
Sidoo kale waxaa goob joog ka ahaa doorashada Wasiirka
Isboortiga iyo Dhalinyarada Saleebaan Colaad Rooble, Mas'uuliyiin ka socotay
Xiriirada Cayaaraha kala duwan ee Soomaaliya, qurba joogta iyo kuwa
kale.
Gudiga Olimbikada Soomaaliyed ayaa soo maray heerar kala duwan,
iyadoona uu ku caan ahaa is qab qabsiga dhinaca xilalka, waxaana muranada ka
dhasha xilalkaas loo aaneeyaa is daba marin iyo lacago lunsasho ay sameeyaan
Hogaanada, iyadoo ay usii dheer tahay shaqsiyaadka ama mas'uuliyiinta oo
qaarkood ka eegta danahooda gaarka oo ay ugu weyn tahay marka ay aadaan safarada
dibadeed ee isboortiga inay baxsadaan.