Wasiirka Cadaalada iyo Garsoorka Xukuumada KMG ee Soomaaliya Sheekh
Cabdiraxmaan Janaqow oo maanta booqasho ku tagay xabsiga dhexe ee Muqdisho ayaa sheegay in si deg-deg ah maxkamad loo soo hortaagi doono dhammaan maxaabiista ku jirta Xabsiga dhexe, kuwaasoo aan
muddo labo sano helin wax maxkamad.
Sheekh C/raxmaan Janaqow ayaa sheegay
in maxaabiista muddada dheer isaga xiran xabsiga dhexe ay dhaqso heli doonaan xukun caadil ah, ciddi dambi lagu waayana ay xorriyaddeeda dib u heli doonaan, wuxuuna cadeeyay in wasaaraddiisa oo howshaas
qaabilsan ay ka shaqeyn doonto sidii maxaabiista ay caddaalad u heli
lahaayeen.
"Waa suurta gal in Maxaabiista qofkii dambi leh Maxkamad ay
xukunto, qofkii aan dambi laheyn Maxkamada waa sii deyneysaa"ayuu yiri C/raxmaan
Janaqow
Wasiirka ayaa sheegay in aaney Shareecada
Islaamka qabin in dad aan waxba galabsan xabsiyada laysaga haayo, wuxuuna carrabka ku
dhuftay in wasaaraddiisa ay arrintaas si dhaqso ah wax uga qaban
doonto.
Taliyaha Ciidamada Asluubta Gen. Cabdullaahi Macalin Cali oo gacanta
ku haaya Xabsiga ayaa wasiirka ku wareejiyay Maxaabiista, isagoona sheegay in
59-maxbuus oo ay soo kala xirteen Maxkamada Gobolka Banaadir, tan Degmada Xamar
Weyne, Dharkenley iyo Maxkamada Ciidamada ay ku hayaan Xabsiga, sidaas darteed
ay Wasiirka ku wareejiyeen cadaaladooda iyo maxkamadeyntooda.
Maxaabiista
ku xiran Xabsiga dhexe ee Xamar ayaa waxaa la soo xiray xilligii ay jirtay
Dowladdii TGF-da, waxaana qaarkood aysan helin wax maxkamad ah, iyagoona muddo
labo sano ay ahaayeen kuwo xabsiga ku jiray, xilli xaaladooda caafimaad laga
deyrinayay.