Hey'adda Culimada Soomaaliyed ee dhowaantan ku shiray Muqdisho iyo
Dariiqada Ahlu Sunnah Waljamaacah ayaa si isku mid ah u soo dhoweeyay go'aankii
Golaha Wasiirada ku gaaray in dalka Soomaaliya lagu dhaqo Shareecada
Islaamka.
Afhayeen u hadlay Hey'adda Culimada Soomaaliyed ee dhowaan
looga dhawaaqay magaalada Muqdisho ayaa soo dhoweeyay ansixinta Golaha
Wasiirada, isagoona ku tilmaamay tallaabo loo qaaday dhinaca wanaagsan oo yididiilo leh.
Sidoo kale
Mas'uul isna u hadlay Dariiqada Culimada Ahlu Sunnah Waljamaacah oo la yiraahdo
Sheekh Cabdullaahi Sheekh Cabdiraxmaan ayaa ku tilmaamay go'aanka Golaha Wasiirada
inuu ahaa mid loo baahnaa, isagoona carabka ku adkeeyay in go’aankaas uu meesha
ka saari doono shaki laga qabo in Dowladda hadda Soomaaliya ka jirta ay tahay
mid aan dooneyn in Dalka Soomaaliya lagu dhaqo shareecada Allaah.
Hadalkan ay soo saareen culimaa'uddinku ayaa yimid maalin kaddib markii ay Golaha wasiiradu shalay go'aansadeen si buuxdana isgu raaceen in waddanka Soomaaliya lagu maamulo shareecada Islaamka, ayadoo ansixinta go'aankaasna la horgeyn doono Barlamaanka KMG ee Soomaaliya oo berrito markii ugu horreeysay isugu iman doona shir ka dhici doona magaalada Muqdishu.