War aan kasoo xiganay shabakadda Jowhar ayaa sheegaya in Malaaqyada Beelaha Xamar iyo Xamar Daye oo maanta kulan xasaasi ah la qaatay
Hogaamiyaha Ururka Xisbul Islaam Sheekh Xasan Dahir Aweys ayaa sheegay inuu ka
aqbalay nabad ku soo dabaalida Gobolka Banaadir.
Odayaashan iyo
malaaqyada ayaa sheegay in hada kadib aan Sheekh Xasan Dahir lagu tilmaami karin
dagaal ooge, iyagoo cadeeyay in haatan uu Sheekh Xasan qaatay nabad iyo xabad
joojin.
Malaaq Cali Malaaq Showri Malaaq Colow oo ah Malaaqa Xamar iyo
Xamar Daye ayaa sheegay in dhinacyada kale ee Dowladda KMG, AMISOM iyo Xarakada
Alshabaab ay kala kulmi doonaan xaalada Gobolka Banaadir iyo nabad ku soo
dabaalideeda.
Malaaq Showri ayaa sheegay in talada Gobolka Banadir dadkii
ka go'ada ay yihiin, isla markaana aqbalaada uu aqbalay nabada Sheekh Xasan
Dahir ay hor dhigi doonaan Dowladda Soomaaliya iyo AMISOM iyo Xarakada
Alshabaab.
Waxaa uu sheegay in Sheekha ay isku wada afgarteen waxyaabihii
ay ka wada hadleen, waxaana uu tilmaamay in hadafkooda uu yahay sidii ay nabad
ugu soo dabaali lahaayeen guud ahaan Gobolka Banaadir laguna wada noolaan lahaa
nabad iyo degenaansho.
Dhinaca kale Sheekh Xasan Dahir Aweys Hogaamiyaha
Xisbul Islaam ayaa dhinaciisa sheegay inuu soo dhoweynayo soo jeedinta
odayaasha, waxaana uu tibaaxay in kulamadan oo kale ay noqon doonaan mid
soomaalida xasilooni lagu raadiyo.
Magaalada Muqdisho oo ay ragaadiyeen
dagaalada iyo rabshadaha ayaa waxaa dhinacyada isaga soo horjeeda ay yihiin kuwo
shacabka ku dul dagaalamaya, waxaana dagaaladaas ay ka dhasheen barakac baahsan
oo ay sameeyeen dadkii ku dhaqanaa Gobolka Banaadir.