Dowladda Soomaaliya ayaa shaaca ka qaadday in ay la wareegi doonto gacan ku
heynta gobollo dhowr ah oo ku yaalla Koofurta Soomaaliya, kuwaasi oo ay haatan
ka taliyaan kooxo ka soo horjeeda Dowladda Soomaaliya.
Ra’iisal Wasaare
ku xigeenka Soomaaliya, ahna Wasiirka Kalluumeysiga iyo Kheyraadka Badda
Xukuumadda Midnimada Qaran ee Soomaaliya Prof. C/raxmaan Xaaji Aadan Ibbi oo
shir jaraa’id ku qabtay magaalada Muqdisho ayaa sheegay in ay dowladda
Soomaaliya todobaadyada soo socda la wareegi doonto gobollo dhowr ah oo ku
yaalla Koofurta Soomaaliya.
“Haddii Alle idmo todobaadyada soo socda
dowladda dadka ku dhaqan gobolladaas waa ay ka dulqaadi doontaa caburinta” ayuu
yiri Ra’iisal Wasaare ku xigeenka Soomaaliya Prof. C/raxmaan Aadan
Ibbi.
Prof. Ibbi oo sii hadlayay waxaa uu intaas ku daray in Dowladda
Soomaaliya ay hanan doonto ammaanka dalka Soomaaliya, wuxuuna carrabka ku
dhuftay in ay shacabka Soomaaliyeed heli doonaan nabadgelyo ay ku
naaloodaan.
Warkan uu sii daayay Prof. C/raxmaan Ibbi ayaa wuxuu ku soo beegmayaa iyadoo
gobollo dhowr ah oo ku yaalla Koofurta Soomaaliya ay gacanta ku hayaan Xoogag ka
soo horjeeda Dowladda Soomaaliya iyo weliba iyadoo degmooyin ka tirsan Gobolka
Banaaddir ay isku horfadhiyaan Ciidamada Dowladda Soomaaliya iyo Xoogagga Xisbul
Islaam iyo Xarakada Shabaabul Mujaahidiin oo ka soo horjeeda.