In ka
badan 30 mudane oo ka tirsan Baarlamaanka Somalia ayaa saaka ka ambabaxay
Magaalada Baydhabo si ay uga qeyb galaan shirka Jabuuti halkaasoo lagu wado in
lagu soo dhiso dowlad Midnimo qaran oo markii ugu horeysay Mucaaradku ay ka dhex
muuqdaan.
Labo
diyaaradood ayaa saaka waabarigii hore ka qaaday xildhibaanada Baarlamaanka
garoonka diyaaradaha ee magaalada Baydhabo,waxaana Magaalada Baydhabo ku haray 7
xildhibaan oo la sheegay in ay u joogaan sidii ammaanka ayb isagu duba ridi
lahaayeen.
Magaalada
Baydhabo ayaa sadex maalmood ee ugu dambeysay waxaa ka ambabaxay inta badan
xildhibaanada Baarlamaanka kuwaas oo hada kusugan Magaalada Jabuuti halkaasoo la
doonayo in lagu soo dhiso dowlad midnimo
qaran.
Tagitaanka mudanayaasha
Baarlamaanka soomaaliya ayaa ku soo beegmaysa xili Magaalada Jabuuti ee dalka
Jabuuti ay ka soconayaan dadaalada dib u heshiisiinta soomaaliya oo la doonayo
in lagu soo unko dowlad Midnimo qaran oo markii ugu horeysay ay ku
mideysanyihiin xukuumada KMG ah iyo Mucaaradkeeda inkastoo ay jiraan qaar ka mid
ah xoogaga Mucaaradka oo ka biyadiisan heshiiska, wallow ay dowladda KMG ahi
dhowr mar ka codsatay dhinacyada heshiiska ka maqan inay ku soo biiraan miiska
wadaxaajoodka si dhibaatada looga saaro ummada soomaalida kadib markii dalku uu
soo maray ku dhawaad 20 sano oo guluf colaadeed oo hadba dhan u
socda.
Si
kastaba ha ahaatee xaalada Magaalada Baydhabo ayaan la ogayn sida ay noqon
doonto maadama Ciidamada Itoobiya ee halkaasi ku haray ay isku diyaarinayaan
inay baxaan waxaana wararku sheegayaa in saaka halkaasi ay ka soconayaan kulamo
saraakiisha gobolka ay la leeyihiin Ciidamada Itoobiyaanka iyadoo wax laga wada
hadlayo ay u badan tahay xaalada ammaan ee xarunta Baarlamaanka Somalia ee
Magaalada Baydhabo.