Howlihii Dekeda weyn ee Magaalada Muqdisho ayaa hakad galay, kadib markii uu ku
soo xirtay Markab weyn oo saanad milateri u sida Ciidamada AMISOM ee ku sugan
Magaalada Muqdisho, iyadoona soo xirashada Markabkaas kadib la maqlay dhawaqa
Madaafiic Hoobiyeyaal ah oo lagu tuuray Dekeda.
Wararka ka imaanaya
Dekeda ayaa sheegaya in tiro Hoobiyeyaal ah ay ku kala dhaceen gudaha iyo
hareeraha Dekeda, taasoo ilaa iyo hada la soo sheegin inay qasaare geysteen,
hase yeeshee waxaa qal qal weyn soo wajahay dadka ku dhaqan Degmooyinka Xamar
Weyne iyo Xamar Jajab.
Xoogaga Alshabaab ayaa sheegtay Mas'uuliyada
weerarka Hoobiyeyaasha, waxaana Saraakiisha Alshabaab sheegeen in Madaafiic ay
la beegsadeen Markabka Saanad Milateri u wada AMISOM.
Markabka ayaa la
sheegay inuu soo xirtay saaka subaxdii waxaana la joojiyay howlihii dekeda ka
socday, waxaana mar kaliya isku gadaamay Markab Ciidamada AMISOM.
Goob
joogayaal ayaa sheegaya in Markabka uu sida Saanad Milateri iyo Sahay isugu jira
raashiin iyo dawo caafimaad, kaasoo ilaa iyo hada aanay dejintiisa
bilaaban.
Afhayeen u hadlay Ciidamada AMISOM oo la yiraahdo Brigiye
Bahoku ayaa beeniyay in Markabka uu wado Saanad Milateri, isagoona qeexay in
Markab uu yahay mid deeq ah oo ay soo gaarsiisay Qaramada Midoobey, wuxuuna
sheegay in alaabo kala duwan oo sahay ay ku jiraan.