Isniin, April 27, 2009: Guddoomiyaha Ganacsatada Suuqa Bakaaraha Cali
Maxamed Siyaad (Cali Dheere) oo maanta shir jaraa’id ku qabtay magaalada
Muqdisho ayaa sheegay in gudaha Suuqaas ay ka bilowdeen dhismayaal sharci darro
ah.
Guddoomiyaha waxaa uu sheegay in ay jiraan Dad ganacsato ah oo doonaya in ay
dib u dhistaan waddooyin gudaha Suuqa laga banneeyay, si loogu gurmado Suuqa
haddii uu dab kaco, wuxuuna dhismayaashaas ku tilmaamay kuwo sharci darro
ah.
Sidoo kalena, Cali Dheere waxaa uu sheegay in gudaha Suuqa uu ku soo badanayo
qashin, wuxuuna taasi ku eedeeyay ganacsatada qaarkood oo bacaha, warqadaha iyo
qashin kale ku daadiya gudaha Suuqa, “Waxaan sameynay guddi qashinkaas ka gura
Suuqa, waxaana ku tabarucnay gaadiidkii qashinkaas qaadi lahaa”ayuu yiri Cali
Maxamed Siyaad (Cali Dheere), Guddoomiyaha Ganacsatada Suuqa Bakaaraha.
Maamulkii Gobolka Banaadir ee uu Guddoomiyaha ka ahaa Maxamed Cumar Xabeeb
(Maxamed Dheere) ayaa wuxuu gudaha Suuqa Bakaaraha ka sameeyay Waddooyin waa
weyn oo ay dadka iyo gaadiidka mari karaan, wuxuuna maamulka tallaabadaas qaaday
kadib markii dhowr jeer oo qeybo ka mid ah Suuqa dab ka kacay lagu guuleysan
waayay in la demiyo sabab la xiriirta iyadoo la waayay waddooyin loo maro.