Afhayeenka Golaha Dhaqanka iyo Midnimada
Beelaha Hawiye Axmed Diiriye Cali ayaa sheegay in dagaallada ka sii socda
Magaalada Muqdisho ay u arkayaan kuwo lagu barakicinayo dadka Muqdisho ku nool,
sidoo kalena looga soo horjeedo in ay guryahooda ku soo noqdaan dad badan oo
horay uga barakacay.
Axmed Diirye waxaa uu sheegay in ay ka xun yihiin duqeyn shalay ka dhacday
Magaalada Muqdisho oo ay ku dhinteen dad badan oo rayid ah, kuwo kalena ay ku
dhaawacmeen , sidoo kalena waxaa uu sheegay in ay ka xun yihiin dagaal shalay
lagu qaaday fariisin ay Ciidamada Amisom ku leeyihiin Magaalada Muqdisho.
“Weerar lagu qaado Ciidamada Amisom waxaan u aragnaa inaan waxba looga
qaadeynin, waayo waxay ku jiraan Ciidamadaan dhismayaal shub ah, hub ay isku
difaacaanna waa ay heystaan”ayuu yiri Axmed Diirye Cali oo sheegay in madfacii
lagu rido ciidamadaas iyo midkii aysoo ridaan ay labaduba dad rayid ah ku
waxyeelloobaan.
Axmed Diiriye waxaa uu sheegay in ay xiriirro la sameeyeen qolaha
dagaalladaas sheegta, wuxuuna sheegay in ay ka diideen in ay dagaalka joojiyaan,
dhegahana ay ka fureysteen, “Waxaan leenahay haddii aad diin leedihiin oo aad
dad Muslim ah tihiin dagaalka ka joojiya hambada ka soo hartay dagaalladii
cuslaa ee dalka ka dhacay”ayuu yiri Axmed Diirye oo u waramayay Idaacadda
HornAfrik ee Magaalada Muqdisho.
“Waxaan la yaaban nahay dagaalka Muqdisho kaliya loo soo xawilayo ee la
leeyahay gaalo ayaa lagula dagaallamayaa, iyadoo aan ognahay in ay jiraan
gobollo kale oo ay gaalo joogto”ayuu yiri Axmed Diirye Cali, Afhayeeka Dhaqanka
ee Golaha Dhaqanka iyo Midnimada Beelaha Hawiye.