Gudoomiyaha Odayaasha Beelaha Hawiye Maxamed Xasan Xaad oo maanta shir jaraa'id
ku qabtay magaalada Muqdisho ayaa ugu baaqay shacabka ku dhaqan magaalada
Muqdisho inay sameysteen Ciidamo madani ah oo ammaankooda suga.
Maxamed
Xasan Xaad ayaa u tilmaamay dadka reer Muqdisho inay Degmo kasta ama xaafad
xaafad u sameystaan Ciidamo madani ah, isagoona sheegay in hadii arrinkaas lagu
dhaqaaqo ay yareyn karto falalka amni darada ee ka jira
Magaalada.
"Waxaan shacabka Muqdisho ugu baaqeynaa inay sameystaan
Ciidamo Madani ah oo ammaanka u suga, iskana celiyaan kooxaha dilalka
geysta"ayuu yiri Maxamed Xasan Xaad oo ugu baaqay shacabka in qof walba uu goos
dambeedka ku qabto shareecada islaamka in lagu dhaqmo.
Mr Xaad ayaa shacabka u jeediyay in
hadii aanay sameysan ciidamo madani ah ay dhibaatada guryahooda ugu tagi doonto,
isagoona sheegay in degmo kasta ay ku xirnaato degmada kale si looga gudbo
dhibaatooyinka oo uu sheegay inay wadaan qolooyin xun oo dowladda diidan iyo
kuwa nabadgelyo darada ka shaqeynaya sida uu hadalka u dhigay.
Waxa uu si
kulul u cambareeyay dilalka qorsheysan ee ka dhacay magaalada Muqdisho, isagoo
kooxaha ka dambeeyay falalkaas ku tilmaamay kuwo fidno-wadayaal ah oo aan Adduun
iyo Aakhiro rabin wax wanaag ah.
Hadalka ka soo yeeray Maxamed Xasan Xaad
ayaa ku soo aadaya, xilli shalay Afhayeenka Odayaasha Hawiye Axmed Diiriye uu ka
shanqariyay ay ka war heleen in waxgarad iyo odayaal reer Muqdisho ah oo uu ka
mid yahay isaga iyo Xaad lagu xukumayo in la soo dilo.