Garab ka mid ah Ururka Xisbul
Islaam ayaa maanta waxaa ay si weyn u
soo dhaweeyeen go’aanki Barlamanka ee ahaa in dalka lagu xakumo shareecada
Islaamka.
Max’ed Xasan Cameey oo ah
gudoomiyaha garab ka mid ah Xisbul Islaam oo manta shir jaraa’id u qabtay
Saxaafadda ayaa sheegay inay soo dhaweeynayaan go’aankii ay mudanayaasha
Barlamanku ku ansixiyeen ku dhaqanka shareecada Islaamka,waxaana uu xusay in
go’aankaasi uu yahay fursad Soo martay bulshada Soomaaliyeed islamarkaana loo
baahanyahay in laga faa’iideysto,isagoona culumaa’diinka ugu baaqay in ay
bulshada ku dhiira galiyaan miraha ka soo baxay
go’aankaasi.
Gudoomiyaha Xisbul Islaamka Max’ed
Xasan Cameey ayaa waxaa uu intaasi ku daray in ciddii ka soo horjeesata go’aanka
ay maanta ansixiyeen mudanayaasha Barlamanka ay tahay cid ka soo horjeeda ku
dhaqanka Shareecada Islaamka sida uu hadalka u dhigay.
“Waa Faraxad dhagaheyga ku soo
dhaceysa taasoo ah in nimankii Barlamanka ahaa ay qaateen ku dhaqanka Shareecada
Islaamka”ayuu yiri Max’ed Xasan Cameey.
Sheikh Max’ed Xasan Cameey oo ah
gudoomiyaha garab ka mid ah Ururka Xisbul Islaam waxaa uu sidoo kale shirkiisa
jaraa’id ku sheegay in nasiib xumo iyo ayaandaro ay tahay in haatan dagaal uu ka
dhexdhaco xoogaga muqaawamada,isagoona carabka ku dhiftay in jidka
Warshadaha ay haatan xiisado colaadeed
ka jiraan.
“Waxaa wax laga xumaado ah in
raggi shalay u dagaalamayay difaaca diinta Islaamka ay maanta colaad isku
qaadaan oo jidka warshadaha saan saantooda laga dareemo”ayuu hadalkiisa intaasi
ku daray Max’ed Xaasan Cameey.
Shirkaan jaraa’id ee uu qabtay
Ururka Xisbul Islaam garabka uu hogaamiyu Sheekh Max’ed Xasan Cameey ayaa waxaa
uu ku soo aadayaa xili maanta mudanayaasha barlamanka KMG ay ansixyeen in dalka
lagu xakumo Shareecada Diinta islaamka,waxaana garabkii ugu horeeyay ee ka mid
ah garabyada ka dagaalama gudaha dalka oo soo dhaweeyay go’aanka mudanayaasha
Barlamanka.