Jaamacadda Carabta ayaa sida la
sheegay ka codsan doonta Ururka Qaramada Midoobay in cunaqabataynta dhinaca hubka ee saaran dalka Soomaaliya oo xubin ka ah ururka laga qaado si
loola dagaalamo Burcad badeeda Soomaalida, dowladda Soomaaliyana loogu fududeeyo inay awood u yeelato la dagaalanka burcad badeedda iyo sugidda ammaanka dalka guud ahaan.
Al Sayid Samiir Xusni oo ah u-qeybsanaha Arrimaha Afrika ee Jaamacadda Carabta ayaa u sheegay wargayska Misr Alyoom in
jaamacadda carabtu codsi xambaarsan qaadista cunaqabeynta hubka Soomaaliya ay u
gudbin doonaan Golaha Ammaanka ee Qaramada Midoobay marka ay ka qeyb galayaan gudi
ka tirsan kooxda xariirka caalamiga ee
Soomaaliya Shir maalmaha soo socda ka dhaci doona magaalada København ee waddanka Danmark, shirkaaso hordhac u noqon doona in go'aan mideysan laga gaaro arrimaha burcad badeedda soomaalida.
Waxaa uu intaa ku daray in tan iyo
markii la sameeyay dowladda uu hogaamiyo sheikh Shariif ay so korartay baahida
loo qabo in la qado cunaqabataynta Soomaaliya la saaray sanadkii 1991-dii kaasoo
mamnuucaya in hub iyo saanad military Soomaaliya loo soo gudbiyo taasoo ay ku
jirto xitaa dharka ciidamada Military-ga.
Waxaa uu tilmaamay in xalka kaliya
ee xiligaani loo heli karo burcad badeeda Soomaalida ay tahay in la qaado
cunaqabataynta hubka si dowladdu ay u hesho awooda ay u bahantahay ee ay kula
dagaalamayso kooxaha burcad badeeda,waxaana uu intaasi ku soo daray Mr Samiir
Xusni in jaamacadda carabta ay ka go’antahay in taageero dhinaca Siyaasadda iyo Farsamo ay
siiyaan dowladda uu hogaamiyo sheikh Shariif Sheekh Axmed.
Waxaa uu sheegay in Jaamacadda carabtu ay shakki weyn ka qabto
Maraakiibta dagaalka ee ku sugan biyaha Soomaaliya iyo siyaasadda ka
dambaysa,waxaana uu tilmamay in jaamacadda
carabta aysan marna u qorsheysneyn in maraakiib dagaal ay u soo diraan
biyaha Soomaaliya maadaama dowlado waa weyn ay ku fashilmeen wax ka qabashada
kooxaha burcad badeeda.