Wasiirka
Gaashaandhigga Xukuumadda Midnimada Qaran ee Soomaaliya Prof. Maxamed Cabdi
Gaandi oo shir jaraa’id oo uu ku qabtay magaalada Muqdisho waxaa uu ku sheegay
in dowladda Soomaaliya ay gacanta ku heyso qorshayaal lagu tayeynayo oo dib
loogu habeynayo Ciidamada Soomaaliya.
Prof. Gandi waxaa uu intaas ku
daray in isaga iyo madax kale oo ka tirsan Dowladda Soomaaliya ay dalal ka
tirsan caalamka socdaal ku soo mareen, isla markaana ay dalalkaas kala hadleen
sidii ay gacan uga geysan lahaayeen in tababarro loo helo Ciidamada Soomaaliya,
wuxuuna caddeeyay in ay dalalkaas soo dhaweeyeen codsigooda.
“Muhiimadda
ugu horreysa ee Dowladda Soomaaliya waa sidii loo sugi lahaa ammaanka isla
markaana ay dadka ku dhaqan Soomaaliya ay nabadgelyo ugu seexan lahaayeen, uguna
soo toosi lahaayeen”ayuu yiri Prof. Gaandi.
Wasiirka Gaashaandhigga Soomaaliya waxaa uu sheegay in Ciidamada Dowladda
Soomaaliya ee haatan diyaarka ah ay u bilaabi doonaan mushaarooyin, wuxuuna
farta ku fiiqay in marka mushaarooyinka la siiyo kadib ay wax weyn ka qaban
doonaan ammaanka Dalka guud ahaan, gaar ahaan Magaalada Muqdisho.
Dhanka
kalena, Wasiirka Gaashaandhigga ayaa wuxuu maanta la wareegay xilka Wasaaradda
Gaashaandhigga, iyadoo xilkaasna uu kala wareegay mas’uuliyiintii hore ee
Wasaaradda Gaashaandhigga Soomaaliya.