Odayaasha Golaha Dhaqanka iyo Midnimada Hawiye ayaa ugu
baaqay Dowladda Midnimada Qaran ee Soomaaliya in ay ka laabato hadalkii wasiirka Amniga Qaranka
ee ahaa u diyaar garoow dagaal oo ka dhaca Muqdisho.
Gudoomiyaha Golaha Dhaqanka iyo Midnimada Beelaha Hawiye Maxamed Xasan Xaad ayaa ugu baaqay dowladda Soomaaliya in ay ka noqoto oo ay raaligelinna ka bixiso hadalkii wasiirka Amniga Qaranka Cumar Xaashi
Aadan ee ahaa in ciidamada dowladdu ay u diyaar garoobaan dagaal ka
dhan ah cadowga gudaha oo uu ku tilmaamay kooxaha dagaalada ka wada Magaalada
Muqdisho.
Maxamed Xasan Xaad waxaa uu sheegay
in aysan suuragal aheeyn in odayaashu ay ka soo horjeestaan dagaalada
dhinacyada kale ay wadaan, dowladduna ay ku baaqdo dagaalo hor leh oo dhibaato ka
soo gaarto dad Soomaaliyeed oo aan waxba galabsan.
Dhinaca kale Hay’adda culumad
Soomaaliyeed ayaa iyana dhankooda shalayto waxa ay sheegeen in howlihii
Musaalaxo ee ay wadeen ay dhaawacayaan
hadallada aan wanaagsanayn ee ka soo yeeraya masuuliyiinta dowladda qaarkood sida uu
sheegay Sheekh Bashiir Axmed Salaad oo ah gudoomiyaha
hay’adaasi.
Hadaladaani ka soo kala baxay
odayaasha beelaha Hawiye iyo hay’adda culumada Soomaaliyeed ayaa waxaa ay ka
dambeyeen markii wasiirka amniga qaranka dowladda KMG maalin ka hor uu ugu
baaqay ciidamada dowladda in ay la
jihaadaan dhinacyada ku lugta leh dagaalada Muqdisho ka socda.